Piniakkanik tunisassiorneq

Puisit pisarineqartut amiisa affaasa missaat Great Greenland A/S-imut suliassanngorlugit tunineqartarput; Kalaallit Nunaanni ammerivituaq.

Neqit imarmiunit miluumasuneersut, umimmaat neqaat aamma tuttut neqaat Arctic Green Food A/S-imut tunineqartarput. Savaaqqat savallu neqaat Neqi A/S-imut tunineqartarput, taannalu KNI A/S-ip ataaniippoq.

Puisit amii tunisat ukiumiit ukiumut allanngorarput tunisinermit akit silallu pissusaa apeqqutaallutik, takuuk Tabel 14.

Puisit amiinik tunisisoqartillugu aningaasanut inatsit aqqutigalugu tapiissuteqartoqartarpoq. Nunarsuaq tamakkerlugu akit appariarujussuarnerannut atatillugu tamassumalu malitsigisaanik 1970-ikkut naalerneranni 1980-ikkullu aallartinneranni puisinniarnermut akerliuniartorpassuit kingunerisaannik tapiissutit tunniunneqartalerput.

Namminersornerullutik Oqartussat Great Greenland A/S-illu akornanni kiffartuunneqarnissamik isumaqatigiissuteqartoqarneranut tapiissuteqartoqarpoq, takuuk Tabel 15.

Kiffartuussinissamik isumaqatigiissuteqartoqarneratigut Great Greenland A/S pisussaaffeqalerpoq Kalaallit Nunaat tamakkerlugu inuussutissarsiutigalugu piniartut puisit amiinik tunisisarnissaasa ingerlatiinnarnissaanut.

Ammit assigiinngitsut tunineqarneranni akit puisillu pitsaassusaannut akit Great Greenland A/S-ip KNAPK-llu akornanni isumaqatiginninniarnikkut aalajangersarneqartarput, taakkulu aamma ammit tunineqartut pitsaassusiisa pitsanngortinnissaannut suleqatigiillutik.

Nittartakkat takuneqarsinnaasut:

Arctic Greenfood pillugu nittartagaq una takuuk: www.arcticfood.gl

Neqi A/S pillugu nittartagaq una takuuk: www.kni.gl

Great Greenland pillugu una takuuk: www.greatgreenland.com